10 أشياء في مقاييس حياتي ممكن تصنع فارق بسيط سعيد ومُريح في يومي
ولكل شخص طبعاً أشياء تساعده في تغيير نفسيته المضغوطه أو أياً يكن.
بالنسبة لي :
١/ قبل كل شيء قومة الصبح :
"عدد الصباحات اللي كنت ضايقه فيها في هالوقت من اليوم تنعد على الأصابع ، مستحيل مستحيل شيء يعكر جوّي بهالوقت حتى لو كان كبير !
للصباح قدرة عظيمة في إزالة أي توتر أنا أحس فيه ، صح اني أحب النوم لكن لو عرفت إني بضيّع هالساعه وخصوصاً لو الجو غيم وديم أقوم وما أندم .
لذا أيام الاجازات والويكند حسّكم عينكم تفوتون هاللحظة ، أما الدوام غصب بتقوم :D".
٢/الموسيقى وخصوصاً طلال المرحوم :
" هو بالأخص يعني لكن الموسيقى بأشكالها وتنوّعها عامل في تغيير النفسية ".
"كبنت يعني وبنت تحب نفسها جداً ، لذا أنا أعتبر الرياضة قبل كونها متنفس هي حياة ثانية ، اللحظة اللي تعقب الرياضة من التعب والأنفاس المتسارعه كفيلة والله بإحياء قلبك ويومك.
توترت ، طفشت ، أي شيء !
دايركتلي قمّ البس لبس رياضة واتعب لين آخر لحظة توصل فيها أنفاسك وجسدك مقاومتها ، بتلقى نفسك ترمي ثقلك كله وكل شيء شايل همه مع آخر سقوط."
٤/ حمام استرخاء :
"عاد هذا اذا ما جربته أو جربتيه راح عليك نص عمرك ، أي بانيو ان شاء الله البانيو اللي في غرفة أبوك وأمك املأه موية دافية وشغّل الشموع وخذ لك أي شيء منعش لبطنك ومعدتك ومع الماء زيت معطر منعش ريحته ترضيك من جوّا ، موسيقى هادية وسماعات .. الله".
٥/ القراءة :
" بالنسبة لي القراءة لها طقوسها ، يعني مقدر أقولك اني اذا تضايقت ولا تنكدت قريت أكذب عليك !
القراءة لازم تكون في قمة الاتزان النفسي بس جرّب تسرق نفسك من اللي جمبك وتقرأ كتاب الكتروني محمله في جهازك الجوال لكاتب غصباً عنك يسرقك منهم .. مفيد هالهروب".
٦/ الرقص :
"وما أدراك ما قد يفعله الرقص هو الدرجة الثانية للتنفيس بعد الرياضة".
٧/ متابعة فلم :
"ويفضل يكون عميق وملهم عشان تحس الثلاث ساعات أو الساعتين اللي قضيتها كانت تستاهل إنك تغييب عن الوعي معاه بشيء يستاهل ، بالنسبة لي أحب أكتشف أفلام ما اتبع وصايا بس ساعات في ناس معينين نفس مودي لذا أرجع لهم ينصحوني".
٨/ اشترّ لك حاجة الكترونية :
"جرّب تشتري حاجة من الويب ، حاجة تجيك عقب فترة تزرع فيك فرحة بسيطة ، ابحث كثير قبل تشتري ابحث عن حاجة تفرّحك أو على الأقل عارف انها حتزرع سعادة مؤقته تحتاجها تكون جمبك اشترّيها ولو كلفت مبلغ مكلّف نوعاً ما".
٩/ ساعات تمسّك معي نظافة :
" احط قنبلة في غرفتي وافجرّها ، أغيّر ترتيبها تماماً ، أغرّقها عطر وعود .. تمسّك معي ساعات وتخلي نفسيتي حلوة :D".
١٠/ افتح اليوتيوب وجرّب شيء تعليمي :
" البنت المكياج يعتبر متنفس تعليمي جميل ، أحياناً الرسم أو المخطوطات العربية أو تعلّم أشياء عن المواقع أو الفنون بمختلف أنواعها ، المحاولة والتجربة تساعدك انك تحط تركيزك كله على الاتقان والتجربة بحد ذاتها مقاومة نفسية جميلة".
أكيد لكلٌ منّا حاجة معينة تعتبر متنفس خصوصاً بوقت كثرت فيه الأجهزة والالكترونيات والملهيات المغرّية ، الأشياء الحركية أو القديمة اللي كنت تمارسها سابقاً وفيها من الشباب والطفولة مُريحة وبسيطة.
ما أضفت "المشي" لأنك إذا ما تمشي ما تعتبر إنسان إنت كنبة يمكن والمشي أساس يومي وروتين حطّه بقائمتك زيّه زي الأكل والنوم.
أرجو لكم سعادة منبثقة من أبسط الأشياء ()
ليست هناك تعليقات:
إرسال تعليق