السلام عليكم ورحمة الله وبركاته ,
اليوم بإذن الله راح أتكلم لكم عن روتين عنايتي , و بتكلم عن بعض الأشياء اللي استخدمتها ونسبة فائدتها لي .
قبل كل شيء حابة أتكلم عن الثلاث السنوات اللي مضت من علاجي لبشرتي ,
بشرتي دهنية إلى أبعد درجة , وكنت أعاني منها لأنها كانت تطلع لي بثور وحب شباب , و نفسياً كنت أتضايق فاتجهه لجرحها وفقعها لمّا تركت آثار في وجهي وزادت نفسيتي سوء .
عموماً من شدة هوسي إن بشرتي تكون صافية كنت أبكي وأنفسّ على أهلي المساكين , وهم عبالهم كله من دراستي هههههههههههههههه
قعدت ورى أهلي لمّا رحت لدكتور بشرة , ولحسن الحظ ولسوء الحظ في نفس الوقت كان شديد وأخلاقه سيئة جداً جداً .
اللي خلّاني التزم بعلاجي واسمع كلامه بالحرف من الخوف لا يهاوشني ,
المهم صرف لي روكتان لمدة 6 شهور , بقوة 20 ملجم وكان خط العلاج يتضمن شهر فقط علاج بعدين الشهر اللي يتبعه ترطيب مع علاج ثم ترطيب وعلاج وواقي شمس , ثم آخر ثلاث شهور تفتيح بسيط وتوحيد لون .
حقيقة على قد ما كنت فرحانة بالنتائج على ما قد كانت نتائجها سيئة نفسياً وجسدياَ عليَ !
ولا زلت أعاني من الآثار اللي سببها لي العلاج وهي : الصداع , وتساقط الشعر , والتوتر , وانخفاض الضغط , وانيمييا و أيضاً رقّة الجلد وهشاشة العظام .
الغلط ما كان من العلاج أبداً خصوصاً الأشياء الجسدية اللي أثرّها , أكثر شيء كان بسبب تغذيتي السيئة اللي عبارة عن رز و زيوت وبطاطس و أشياء غير صحيّة !
الغلط كان من يدي لأني قريت أضراره وما اهتميت وضلّيت على تغذيتي وما اهتميت إني أعالج من جوا ومن برى .
عموماً ..
صفيت بشرتي وراحت الآثار بنسبة 70%.
وقفت خط العلاج ..
جلست 6 شهور ثانية اتمتع ببشرة زي الثلج بغض النظر عن الهشاشة و الشعر اللي يتساقط ضلّيت اسبح في بحر الراحة النفسية , وما حاولت أعدّل روتين غذائي السيء , لمّا لقيت بشرتي تسوء أكثر من قبل وتشحب كأن عمري 70 سنة !!!
جنّ جنوني !!
تعبتني بشرتي جداً جداً بعد العلاج , ما يناسبها أي شيء من الغسولات ولا أي واقي يناسبها أو كريمات ترطيب !
وإذا شيء ناسبني جيت أرجع أشتريه ألقى مفعوله المرة الثانية شبة معدوم .
انهرت من جديد :(
أبوي حلف ما عاد يوديني للدكتور مرّه ثانية خسر ما وراه وقدامه عليّ هالست شهور ههههههههههههههههههههههههه
دخلت أبحث في النت , خلطات وخرابيط ما فادت معي !
لمَا عرفت إن دائي من غذائي ..
عدلت غذائي وصرت أكل أشياء ما كنت أحبها زي السلطة والخضار و الإيدام وفاكهة وأشرب موية كثير , لمدة شهرين وبدت بشرتي تستعيد نظارتها حبة حبة , بالإضافة لإني صرت أغيّر كل شوي الغسول والواقي عشان يتناسب مع مزاجية بشرتي العوجاء .
عدت الأربع شهور على خير , لمّا رحت ماك الله لا يعيّدها من روحة :(
كنت أدوّر على أساس يناسب بشرتي وما يكون دهني أبداً , و قلت للموظفة من الهبالة اللي فيني : جربي الأساس على بشرة وجهي مباشرةً لأن يديني كانت أفتح من وجهي تكة .
وجربت وقلت أبرجع أشوفها في البيت وأقرر أخذه أو لا !
ورجعت ومع الحر والرطوبة لأني كنت في مكة هذيك الأيام , شبّت النار في المنطقة اللي حطت فيها الأساس وانتشرت الحبوب لمّا انعدم وجهي :(
بسبب الفرشة اللي استخدمها فوق 100 نسمة وجرثومة وغبار وكل أبو شيء :(
ورجعت نفسيتي تسوء أكثر ورجعت أفقع البثور :(
و يا زيد ما كأنك غزيت ! :)
من هنا من هنا يا بشرتي ارجعي تكفين , ما فيّ فايدة !
لما آخر خمس شهور راحت قريباً رجعت أتعالج من جديد والحمد لله ,
طبعاً قال الدكتور استخدمي هالغسولات والعلاجات واذا اختفت و الا راح نرجع نستخدم الروكتان :(
بنبرة حزن : لا يا دكتور تكفى ما أبي أرجع لها :(
الدكتور : حنرجع نستخدم جرعة أقل .
استخدمت الغسولات اللي أعطاني لمّا خلصتها وخفت الحبوب بنسبة 40% , صارت تطلع لي حبة ولا حبتين بس حاولت أتجاهلها !
انتهيت منها ورجعت اشتريها ونفس الحكاية اللي قبل ما فادت بشرتي !
اضطرينا نرجع نستخدم الروكتان بجرعة 10 ملجم , وباقي لي شهر وأتم العلاج إن شاء الله :(
وإن شاء الله يا رب ما يكون تأثيرها زي أول مره استخدمتها !
ليش حكيت لكم هالأشياء كلها ؟
عشان تتجنبون الأخطاء اللي تعرضت لها خلال الثلاث سنوات اللي راحت من إهمال صحتي , و استخدام أشياء الآخرين , و غيرها.
وتستفيدون من فكرة إن اللي بشرتها أصبحت خفيفة بسبب الروكتان تحاول تنوّع في الغسولات والمرطبات , ولا تحاول تلمس البثور أبداً أبداً !
أنا عارفة إن هالشيء صعب عليك خصوصاً إذا أخلاقك زي أخلاقي هههههههههههههه
بس احتمال كبير تترك حفر عميقة في بشرتك وتعالي الحين كيف تعالجينها ؟
طيب خلوّكم منّي ونجي نتكلم عن بعض الأشياء اللي استخدمتها خلال الفترة اللي راحت :
عندنا أول شيء غسول NUXE : Rӗve De Mile
مكوناته الطبيعية هي أكثر شيء حمسّني أستخدم هالمنتج ,
مصنوع من : عسل - جير - زنبق ابيض - ماء الزهر .
ريحتة عباره عن أعشاب عشان كذا لا تتوقعي أبداً إن رائحته عطرية , بس يغلب عليها العسل ,
قوّامه خفيف جداً على البشرة ولطيف .
يناسب البشرة الدهنية - المختلطة .
تنظيفه عميق ومنعش !
بالإضافة لإنه إقتصادي يعني طوّل معاي لمّا خلصته كامل .
تقيمي له 9.5/10
برجع أشتريه إن شاء الله عقب / تجربة جميلة انصحكم فيه .
-
Nuxe Body 24hr Moisturizing Body Lotion
من نفس الشركة اشتريت هالمُرطب ,
بتوصية من الصيدلي لمرطب يستمر ترطيبة لمدة 24 ساعة .
اخذتها بنفس الوقت وكانت أول تجربة لي من هالشركة لكن تجربة مُرضية ,
الكريم للجسم يحتوي على : القمح ومقتطفات الخشب ، اللوز الحلو و زيت عباد الشمس وبلسم البرتقال.
للبشرة الجافة هو لكن بشرتي جسمي عادية ناسبها ورطبها بنسبة 60%
ما يدبّق وخفيف جداً على البشرة وتمتصه بسرعة خلال تسعين ثانية ,
ريحته للأسف كأنها ريحان ههههههه
عموماً انا حبيتها بس كنت إذا حطيته ونزلت على أهلي يقولون شهالريحة :(
تقيمي : 7/10
ترطيبة مو ذاك الزود ولا يستمر لمدة 24 ساعة يرطب تقريباً لمدة 16 ساعة .
مدري لأني استخدمته أساساً في الشتاء وخلقة جفاف , يمكن لو استخدمته في الصيف رضيت أكثر عنه .
-
Bioderma Atoderm cream
شركتي المُفضلة !
الأفضل شيء واللي راضية عنها تمام الرضى !
أحبها جداً جداً ولا عمري جربت شيء وقلت لا موب زين !
مو معناته إنها خالية من العيوب لكن الجميل فيها إنها طبية أكثر من كونها مُجرد تجميلية !
هذا كريم مُرطب أقدر عنه لوشن أكثر منه كريم , خفيف على البشرة وما تحسين فيه أساساً ,
ترطيبة بنسبة 67% للبشرة العادية , يستمر ترطيبة يوم كامل !
خالي من العطور , يعالج بشرتك في نفس الوقت بحيث إنه يعيد توازن الترطيب فيها .
تقيمي :
8/10
حبيته .. بس ما اعتقد إني راح أرجع أشتريه !
-
جينا لأهم شيء تحتاجه أي أنثى ويحتاجه أي ذكر ويحتاجه أي طفل على وجه الأرض !
أساساً كنت في ضياع قبل أعرف هالشيء ,
كنت ما أدرك أهميته أبداً أبداً بحماية بشرتي للأسف إلا من قريب !
بشرة بدون واقي شمس زي الشجرة بدون ظل !
تحرقها تبقعها وكل شيء سيء ممكن تسويه لك الشمس بدون واقي ,
هنا أفضل واقيين قد جربتهم على مستوى تجاربي في الكريمات الواقية !
اللي على اليمين من ماركة فيتشي صديقتي الصدوقة , واليسار سيتافيل المعروف بترطيبة العالي .
اليمين خفيف خفيف خفيف لدرجة إنك تحطينه وتحسين ببرودة وخفة ولا كأنك حاطه شيء !
اليسار لمّاع بس ترطيبة حقيقي والجميل فيه رغم إنه يرطب من قلب إلا أنه ما يطلع بثور !
اليمين تقيمي له 10/10
اليسار تقيمي له 9/10
عيبة بس اللمعة مع إني أحبها لأني أحس البشرة منورّة ورطبة ..
مصيري أرجع أشتريهم بس مو الحين :$
-
نجي لمزيلات العرق !
اللي أهم من المهم هههههههههههههههه
آه شقول هنا !
كيف الواحد يدرك إنها شيء مهم وضروري و إن اللي تحت عضدك أبداً مو شجرة مسك ض1 !
أنا أجرمت في حق الاندر آرم عندي :(
للأسف إنه كان زي القزازة فاتح بس سمّر بسبب استخدامي لمزيل عرق عبارة عن زبالة !
هذا الزفت الله ياخذ اللي صنعه لنا :(
اعدم مره مره فوق ما تتصورون هالمنطقة :(
وصارت حساسة فوق السمار اللي سببه هالحمار :( < واضح إني حاقدة !
لا من جد لا أحد يستخدمه تكفون :(
المزيلين اللي فوق جداً جميلة , صح إنها غالية بس تستاهل !
اليمين يستمر لمدة 48 ساعة استخدمه أيام الدوام , وريحته تنعش الصدر .
واللي ع اليسار يستمر لمدة 12 ساعة للبشرة الحساسة جداً والمرهفه , بدون ريحه !
استخدمته عقب الحمار اللي فوق ما اعدم المنطقة علي !
صرت استخدمه ايام الويكند عشان تتنفس هذيك المنطقة شوي :(
ان شاء الله أعالجها لما ترجع للونها اللي قبل وأجيكم بالحل :$
وانتهينا ..
اتمنى إني ما طولت عليكم ولو طولت عليكم فبشرتكم تستاهل إنكم تختارون بعناية اللي يناسبها !
ويلا انقلعوا :$
*وردة*
ليست هناك تعليقات:
إرسال تعليق