السلام عليكم ورحمة الله وبركاته.
مفروض تخمنون إذا نزلت لكم تدوينة معناته عندي اختبار ، بس زمان كان اختبار ميد الحين تطورت وصرت انزل لكم باختبار فاينل خخخخخ
المهم وأنا بنص المذاكرة وعمقها طرالي أتعطر وأحط مناكير كتغيير للجو يعني عشان أتحمس !
لقيت نفسي أصور لكم المناكير وبعض الأشياء وقلت أسوي ريفيو عنها بما إن أغلبها لي شهر وأكثر استخدمها.
أول شيء ببدأ لكم بالأهم فـ المهم :
ماركة افين انصدمت فيها :(
مو الصدمة اللي تخليك تفقدين ثقتك في المنتج بس الصدمة اللي كنتِ تتوقعين منها أفضل.
بس لـ الأمانة على قد السعر كانت التجربة.
المياة المعدنية ما أعرف ايش أكتب عنها بس هي ريفريش لبشرتك ، تستخدمينها عقب أي مجهود أو التهاب في بشرتك أنا انبسطت عليها خصوصاً بعد الرياضة .. يا الله شقد الانتعاش اللي يصير ههههههههههههههه
بس الصدمة اللي حكيتكم عنها كانت عن الواقي ، يمكن لأني جربته بعد استخدامي لفيتشي وسيتافيل فـ شفته أقل من توقعاتي !
هو حلو والله بس عيبه إن البشرة ما تمتصه بسرعه :(
واللون الأزرق المائي جداً جداً واضح في الساعه الأولى !
كمان طلع لي بنسبة ضئيلة جداً بثور مو كثيرة ومو واضحة بس طلعها :/
لو تلاحظون هو للبشرة المختلطة للعادية وأنا اعتبر مختلطة للدهنية.
عموماً ما ناسبني بس مضطرة أكمل عليه لما يخلص :/
هالشيء حبيبي :$
تبين النضارة واللمعة ؟
استخدميه.
زي اللوشن ينحط عقب تغسلين وجهك ، جداً جميل !
سبق واستخدمته فترة علاج بشرتي بعدين تركته شهرين كذا وعقب رجعت له وبرجع له مليون مره بعد.
هو مكتوب انو للمسامات الوسيعة وللبشرة الدهنية ، مساماتي من بعده بدت تنشد نسبياً وبشرتي دهنيتها متوازنة.
يعني في السليم هالمنتج ..
سعره تقريباً ١٤٠ أو شيء زي كذا :$
بما اننا في منطقة الوجه راح اتكلم بالمرة عن هذا المرطب للشفايف ،
الصيدلي يقول فيه واقي شمس عشان كذا اخذته.
عشان الجامعة والشمس ومع الأرواج بتقلب شفايفي شفايف مدخن خخخخخ
هو كويس وسوا لي حماية لشفايفي نوعاً ما خصوصاً اني يومياً احط روج ، بس مو كويس لان لونه عقب ما تحطينه يطلع ابيض :/
بس انا احطه وانتظر ١٠ دقايق وعقب احط الروج.
ممكن أرجع أشتريه لو ما لقيت حاجة أفضل.
هذا يا حيّ الله مسكرة حواجب أخذتها مع سارونتي :$
سارونتي تقرين ؟
أشكرها لأنها شجعتني رغم اني كنت متخوّفة انو ما يطلع كويس ويكثف لي حواجبي فوق ما هي كثيفة !
أنا كنت محتاجه شيء بس يرتبها لي بحيث ما يطلع اللون بارز للمسكرة أو يجبسها لي تقل حاطه صمغ.
لونه نفس درجة حواجبي ورتبها لي وحبيته وخفيف على الحواجب ما تحسين فيه أبداً وأعطيه ١٠ على ١٠
الحين ننزل تحت شوي :$
كريم اليدين من نيتروجينا !
جربت هذا وجربت النوع الثاني عند أختي.
كلها كويسة بس المرّكز ثباته في الترطيب أعلى.
لو ملاحظين الخط الأسود اللي فوق لأني استخدمه يومياً في الجامعة والأقلام ساعات تعدم لي الأشياء :(
حاولت انظفه ماش عيّا خخخخخخ
المهم نرجع للمنتج ، أعطيه ١٠ على ١٠ لأهم سبب انه خفيف خفيف وما يدبق ومن اول ٣٠ثانية تمتصه البشره ولا كأنك حاطه شيء !
مناكير من فارمسي !
والله ليومكم ذا مدري من وين شريتها ؟
بس ظنتي ظنتي إن كان ما خاب ظني من عند محمود سعيد في بلد جدة !
المهم لونها خُرافي وأنا شخصياً مغرمة فيه وصديقاتي مغرمين فيه و اذا حطيتها ذاك اليوم في الجامعة وما جبتها يا ويلي :$
هنا وأنا حاطتها :$
ودرجتها زي ما انتوا شايفين ٠٣١
لا تفوتكم على مسؤوليتي :$
والعلم سلامتكم :*
ادعوا لي قد ما تقدرون حق ١٠ سنين قدام ههههههههههه
